謝安琪（Kay）今日喺「第41屆十大中文金曲」頒獎禮中，憑《一個女人和浴室》得到十大金曲獎，講到幾多年冇參加頒獎禮，佢話：「好似起碼都有兩年，（咁今年會唔會多出席？）都會，（會唔會4個都去晒？）盡量都會抽時間出席嘅。」問到佢會唔會拉埋古天樂一齊去？Kay話：「我唔會主動拉佢，但都會問吓佢哋意願先，佢參與咗呢首歌有咁多人支持，而有啲獎又係投票嘅呢，會唔會出席要等佢決定，佢都話如果有需要都會抽時間出席，盡量會配合，都唔知最後情況會係點，都知佢好忙，因為佢有幾套戲要做，知道佢話有時間會配合就已經好好。」

對於古仔唱live有冇信心？Kay話：「我對佢一定有信心嘅，咁我哋都合作過，佢個角色係好錫我囉，係絕世好老公，所以o依家睇佢嘅戲時特別有親切感，當佢被人打時我都會心痛，有情感嘅投射。」咁到底會心痛真老公張繼聰多啲定古仔多啲？Kay話：「兩個都心痛，但係就覺得阿聰大隻啲，應該會抵得痛啲。」

古仔頸有事，Kay話知道，並指自己同古仔有密切聯繫，咁老公張繼聰有冇呷醋？Kay笑言：「唔會，都知係工作上嘅嘢，第一次合作就咁好，呢個係緣份囉，令大家可以做到朋友，希望睇吓之後有冇機會合作多啲，其實我哋隻歌個故仔已經寫好晒，公司同事仲笑言使唔使加戲，不過，歌就錄好咗，片都已經拍咗，有得合作已經好滿足。」咁會唔會加條bonus track俾古仔？Kay話：「要同創作人麥生傾吓。」

精選娛聞，喺晒《娛果》
http://fb.com/appledailyent