上周四，日本央行維持息率不變，雖然引嚟政府干預央行決定嘅流言，不過日股就升至9個月高位，更帶動亞洲股市暢旺，恒指升近200點。喺《香港討論區》，有網友認為日本唔加息，應該不利日股，因為唔加息即係代表經濟增長緩慢，股市又點會好。不過，大多數網友就認為有利港股，因為熱錢仍會留喺香港，仲可以用低息借日圓，炒全球股、滙市。

七成估下月加息

網友kawalawa話：「日本唔加息，外資可以繼續借平錢到其他地方投資，亦即係話海外資金唔會回流日本。既然熱錢唔流走，股市當然會繼續向好。」jn1105則持相反意見，「預咗唔加息啦，不過可能反映日本經濟疲弱，不利投資氣氛，小心日股會跌，到時又拖累港股。」
不過，亦有網友認為日本會加息，所以事先買入日圓，點知就不升反跌，Dracomak大喊：「都奇怪日本吹加息吹得咁行，但日圓都仲係咁跌，等我仲驚死蝕底，買咗20萬日圓，依家唔知點算。」網友Iborntowin好擔心咁話：「如果日本開始加息，正好作為大戶造淡嘅藉口，借咗平錢做投資嘅人就要平倉，到時全球股滙市肯定大受影響。」
根據路透社調查發現，45位受訪嘅日本分析師中，七成估下月會加息，至於信定唔信就由你嘞。