【不設內部認購】張敬軒面對黃牛飛大壓力 同事都要出去買飛
蘋果日報 2019/09/20 16:12
張敬軒
張敬軒今日在尖沙嘴出席活動，席間播放一條宣傳片段，軒仔先以選美得獎形態現身，再扮演不同職級員工，軒仔今日現身時失聲說話走音，被在場主持問及早前擔任好友關智斌（Kenny）演唱會嘉賓，軒仔即提起語氣：「唔係好友，佢係我師兄，比我早入公司。」
軒仔日前在Kenny演唱會上表現甜蜜，中氣十足，他否認做嘉賓後失聲，並以微弱沙啞聲線解釋：「之前發燒，而家聲帶發炎，有排都唔唱得歌，籌辦新夜店，兩至三個月睇工程，積埋辛苦發出嚟病咗，而家病好過十一月演唱會先病。」軒仔表示工作過後將會停工休養一星期。
軒仔為演唱會作準備，為門票問題頭痛，他說：「咁樣講好似好折墮，面對門票黃牛飛好大壓力，唔單只係公司上，去到藝人上都好難做，今次我唔想牽涉錢在內，不設內部認購，同事都要出去買飛，我又冇歌迷會，都幾難搞，但我始終想以歌迷利益為先，若再開騷想諗掂飛問題先。」軒仔去年舉辦六場個唱時向公司要求七百張門票，但最終只得一百三十張，難以和親友交代，他說：「 只能斷六親，順得哥情失嫂意，每次搞分飛都分飛燕，開騷前就埋頭苦幹分飛。」十一月軒仔和香港中樂團合作舉辦三場演唱會，門票比之前更緊張。
（攝影：林賓尼）
軒仔為演唱會作準備，為門票問題頭痛。
軒仔日前在Kenny演唱會上表現甜蜜，中氣十足 ，他否認做嘉賓後失聲。
十一月軒仔和香港中樂團合作舉辦三場演唱會，門票比之前更緊張。