李克勤昨晚到佛山舉行巡唱，遇上颱風山竹吹襲，晚上近7點收到當地有關單位通知，演唱會可能要取消，當時克勤已經化好妝準備就緒，聽到消息後成個人呆咗，惟有坐喺化妝間彈住結他邊唱邊等。

最後大會同主辦單位爭取，終於演唱會可以如期舉行，但有條件限制只准唱到10點，不過，結果克勤卻唱到10時15分才完場，佢在台上向觀眾致歉：「我開騷前收到通知，話打風唔可以舉行今晚演唱會啦，嗰時你哋已經有大半人入咗場，經過一番努力爭取，感謝有關當局，最後終於特赦批准我開騷，但唯一要我哋答應條件係唔可以引起混亂，要大家早啲平安返屋企，所以今晚個騷濃縮咗好多，但係我每首歌都好俾心機去唱，希望你哋感受到。」

事後克勤表示：「唔做會引起好多問題，個騷爆晒，觀眾又已經入咗場。我係8點05分才收到指示可以做，最後我都偷雞唱到10點10分，多謝有關當局放我哋一馬。咁打風大家都明白，我喺台上都無奈，好多歌準備咗唱唔到，第一次遇到呢啲事，又上一課，人生經驗又豐富咗。」

此外，近年大陸流行親子節目，問到克勤會否帶兩個囝囝參與？克勤話：「你係咪話個啲爸爸唔知去邊度節目？哈哈，我有睇，有啲參加藝人都係我朋友，但我兩個仔好大個啦，都係乖乖地喺屋企讀書啦，搵錢呢啲嘢等我做老竇辛苦得啦。山竹颱風打到嚟，老婆不停叫我快啲返『打風呀！快啲返嚟湊仔。』」

完騷後克勤馬上趕返港，當時已經掛起8號波，好在無風無雨，克勤仲去買煲仔飯返屋企宵夜：「今朝真係好大風大雨啦，睇到朋友傳啲片來，爆窗嗰家人唔知點呢？都好心嗡，希望個風快啲過啦，大家都平安無事就最好。」

精選娛聞，喺晒《娛果》
http://fb.com/appledailyent