今日係情人節，不過喺之前已經有唔少韓國網站進行問卷調查，例如上周有網站以「情人節最想同邊位男藝人度過」為題進行調查，結果顯示人氣韓劇《鬼怪》男星孔劉獲得冠軍，而今日再有網站公開調查結果，孔劉再度以高得票率獲選為「情人節最想送朱古力畀邊位男演員」冠軍，可見雖然《鬼怪》已經播完一段時間，但劇集嘅熱潮仍然未散。

據知共有1758名網民參加「情人節最想送朱古力畀邊位男演員」為題嘅調查，於1169名女網民中，有29.5%嘅網民揀想送朱古力畀孔劉，而同劇男星李棟旭就以10.9%得票率排第3名，而《雲畫的月光》男星朴寶劍及同門師兄宋仲基分別以19.3%及9.5%排第2、第4名。

至於餘下嘅589名男網民，就以「最想收到邊位女演員嘅朱古力」為題進行調查，有13.9%嘅網民揀咗《W》女星韓孝珠，「國民初戀」秀智就以12.6%得票率排第2名，《鬼怪》劉仁娜、《Doctors》朴信惠、《太陽的後裔》宋慧喬就分別以11.2%、8.7%及6.6%排第3至第5名。

另外，孔劉及李棟旭亦包辦另一個為題「情人節最想向其表白嘅明星」嘅調查結果冠亞軍，當中孔劉嘅得票率高達40%，而李棟旭就有34%得票率，而朴寶劍就憑14%得票率排第3名。而女藝人方面，秀智以37%得票率獲得冠軍，女團AOA成員雪炫就以31%得票率排第2名。

此外，孔劉早前飛到澳洲拍攝嘅品牌廣告於今日見街。