自由黨副主席周梁淑怡自己都算係政治明星，要搵其他明星級人物為佢站台，真係有啲傷腦筋，好彩佢交遊廣闊，又多娛樂圈老友，噚日就搵名嘴蘇施黃到青衣助選。

阿蘇舊年曾挺葉劉，今次都有拍短片幫葉劉拉票，即係叫人唔使投票畀自由黨林翠蓮啦；由港島去到新界西，阿蘇卻叫人支持周梁，好彩八方唔係港島選民，又冇得喺新西投票，否則都好混淆。阿蘇對食物味道愛恨分明，推介候選人好似冇咁考究。
周梁話同阿蘇識於微時，幾十年前做電視台時就相識，講到咁熟，阿蘇可唔可以用一種食物形容周梁呢？佢話似苦瓜。周梁成日笑笑口，似咩!?阿蘇話因為周梁經歷過甜酸苦辣，𠵱家苦盡甘來，所以似苦瓜喎。八方聽完，認為阿蘇都係做飲食節目主持好過助選團。
政治明星搵明星主持拉票，但唔係個個候選人都星光熠熠，不過白鴿黨李華明今日都有明星幫忙造勢，政治方面有陳太同華叔，演藝界就有河國榮同苑瓊丹，佢話唔係臨時拉伕，係幾年前透過街坊介紹認識兩人，「有嚟我啲活動做嘉賓㗎。」佢又話下月初會打親情牌，四兄弟一齊上陣拉票。