當年利森因押重注日本股票期貨觸礁及隱瞞虧損,令霸菱蒙受14億美元損失而倒閉,佢被判刑6年半。不過,佢喺新加坡坐咗3年半後,就因患大腸癌獲釋,佢喺獄中將經歷寫成嘅《RogueTrader》,其後搬上大銀幕,拍成電影《股壇狙擊手》,由伊雲麥葵格(EwanMcGregor)扮利森。
利森出獄後,有唔少機構搵佢演講,每次收費高達5000英鎊(約7.5萬港元),收入認真唔錯。除咗演講,佢喺05年仲做咗愛爾蘭足球隊GalwayUnited嘅商務董事㖭!
唔講唔知,咪以為利森當年嘅所作所為會嚇窒投資者,佢話𠵱家都仲有唔少人搵佢代為投資,之不過經一事長一智,佢話輸晒自己啲錢就冇所謂,但如果受人所託,就有責任幫人賺錢,諗落都係制唔過。所以,過去四五個月,利森都淨係攞自己嘅退休基金嚟炒美元,亦甚少沾手股票或商品市場。不過佢話,如果第日唔撈份工,就索性全天候對住部電腦做人,專職炒賣喎!
[email protected]