去泰國又點少得「食好西」呢？首本《米芝蓮指南曼谷》今日公佈( 新聞連結： http://bit.ly/2nycRyw )，少年食神Michael（林澄光）日前同「細細粒」陳嘉佳（小寶）去曼谷觀光喪食之旅，咁啱就幫襯過指南中推介嘅星級食肆，喺四面佛附近嘅米芝蓮一星餐廳Paste嘅咖喱蟹。

細細粒今日接受《蘋果》電話訪問話Paste嘅咖喱蟹都令佢食到舔舔脷：「蟹係非常非常非常之美味，泰國嘅咖哩蟹唔同香港食嗰啲，佢裏面有加蛋，雖然煮出嚟黃咁咁，但食落去唔辣，蟹肉好新鮮紮實，啲咖哩汁唔會搶晒啲鮮甜，咖哩汁好惹味，裏面加咗蛋，用嚟撈麵撈飯食一流，我可以成碟連蟹連汁食晒。」細細粒話呢次有Michael做導遊，又吃又買大收穫，加上住宿安排都好舒服，不過卻爆出瘀事，細細粒話：「我住嗰間酒店好靚，入到房見到有杯水有朵花，我以為係welcome drink，好興奮飲咗。到第二日有人嚟執房，佢拎住我飲過嘅welcome drink去洗手間水喉度再倒一杯出嚟，我呆咗，佢話係擺喺度裝飾，唔係飲㗎。」

少年食神Michael話呢次同細細粒食得好開心，因為大家都係好鍾意食嘢，Michael話：「咁啱我帶佢我一直有去開食嗰幾間餐廳，今日米芝蓮摘星食肆榜上有名。嗰間食蟹，佢單係個presentation都值得去打卡，最啱相機先食。小寶好為食，我平時食三道菜都飽，佢幾乎食晒成個menu嘅嘢。」

除咗米芝蓮餐廳之外，佢哋仲齊齊推介唐人街嘅Ann Guay Tiew Kua Gai嘅窩蛋雞肉炒闊河粉，Michael話：「佢哋用炭火炒，好夠鑊氣，一碟50銖，大約10幾蚊港幣，即使排隊都值㗎。」細細粒大讚炒河好正，仲好回味：「佢啲河粉煎到兩邊都好香，我未食過咁好味，好想有機會再去食，我一個人食三碟係閒閒哋，咁一定得。」

而仲Michael取笑細細粒為食唔肯找數，所以呢次有捉埋佢做吓運動：「佢一路食，一路叫飽，但轉頭又要跟住食，我有要佢找數做運動平衡吓。」

更多娛聞，喺晒《娛果》
http://fb.com/appledailyent