練馬師苗禮德今季開設Instagram，間唔中都會將廐內照片同短片放上IG，俾廣大馬迷更了解馬房運作。有時佢會將馬匹操練短片發佈，其中一匹就係今日（8日）沙田第七場四班泥地1650米嘅「皇牌」。

條片係上月29號「皇牌」試完閘，騎師「炒飯哥」羅理雅向苗禮德匯報馬匹走勢，炒飯哥對「皇牌」表現感到滿意。

「皇牌」今場對手非善男信女，包括「大步走」、「和諧氣氛」同「五星特工」等，不過炒飯哥之後講到明「皇牌」有樣優勝地方，就係有新鮮感。

「皇牌」流過兩次鼻血，係正宗孱仔馬，在港跑過21場只得1亞2季，仍未打開勝門，但舊年11月隻馬第二次流鼻血後，休息5個幾月喺季尾復出，幾乎29倍偷襲得手，只影相輸畀「好腳頭」屈居亞軍。

今次「皇牌」季內初出，體力最為充沛，兩次泥閘都交出唔錯追勢，孱仔馬唞唞埋埋，趁健康正常出擊，一定唔會有保留，屆時就會知道苗禮德IG內發佈「皇牌」片段，係咪真係大有玄機變相派貼士。

苗禮德Instagram中上載的「皇牌」片段：
http://www.thepictaram.club/share/BZnMhaFn5u-