跳出主播圈，投入品酒世界，一杯Sauvignon Blanc在手，黃大鈞以酒論三位特首：董建華像波爾多紅酒，系出名門卻生於極壞年代，「好多人都會覺得唔好飲」。曾蔭權猶如新世界智利及澳洲的table wine，大眾化得人人飲得起，「但未必會令人留下深印象」。梁振英呢？原來像Fino Sherry（些厘酒）：「呢種酒唔係人人都鍾意，開咗仲要拿拿聲飲晒……唔等得太耐」。重點是：「如果有得揀，Fino Sherry唔會係我首選。」
少年大鈞飲慣啤酒，直至某年Uncle請食飯，喝下人生第一口82年Lafite，從此轉投葡萄酒懷抱。相約他在IFC的Amo Eno，回憶愛追酒也愛劈酒的輕狂歲月，無數次「劏」與「嘔」，還不及這次經典：「有次有個攝影師結婚，我俾一班姊妹劈冧，其中一個姊妹係肥妹嚟㗎，之後佢係咁攬住我……所以我之後都唔畀自己再飲大咗。」

出書《戀上葡萄酒》

「點解學品酒？真係多得TVB。」還任記者兼主播時，積存大量補假，「公司當然唔會補錢畀我，咪被迫放假，每星期放多一日，諗住搵啲課程讀，見到個品酒班夾到時間，跟住就一發不可收拾」；最瘋狂的品酒初階期，「癲到邊度有酒飲、要錢唔使錢都會去」。
2012年中離開無綫新聞部，其後專注發展「興趣」，最近出任香港葡萄酒商會餐飲文化發展委員會主席，推動葡萄酒普及化，「想令飲葡萄酒呢樣嘢更加入屋」。
他同時倡議Bring Your Own Wine運動，希望更多餐廳向顧客免收或平收開瓶費，鼓勵市民自攜美酒配佳餚。其他數之不盡的「Wine理」，大鈞會在新作《戀上葡萄酒》一一細述，周五晚更在會展舉行簽書會。
記者　許偉賢