【厚此薄彼?】親生女亮相機會特別多 王卓淇:係輪流嘅
親生王卓淇美女廚房伍樂怡
新一輯嘅《美女廚房》啱啱喺上周六播咗第二集,雖然呢個節目只係播咗二集咁大把,但係已經劣評多多,先係話第一集啲主持人同啲女藝人唔夠互動,畫面太散,又係不停loop嗰啲「姐手姐腳」活捉海鮮、處理食材、爆咪尖叫,總之要搞啲女藝人到狼狽又失儀!
查實今次同上一輯最大唔同地方,就係多咗20個聲稱係美女學徒嘅女仔,而呢班女仔除咗係嚟自大台嘅藝訓班小花之外,仲有一啲係網紅、打碟DJ、o靚模同埋落選港姐,本來應該個畫面好養眼,點知呢個美女學徒長時間坐喺錄影廠,間唔中會見吓啲大特寫,其餘時間得個坐字!
今日就有報道話呢班美女學徒上演大亂鬥,佢哋劃分親生女同非親生女,兩組美女喺冇傾偈嘅情況下,試過有人開工玩遲到,甪拜神爭企位,甚至有人不甘無綫「大細超」、錫晒自己親生女如拍過《三日兩夜》嘅伍樂怡、王卓淇、陳展鵬女友單文柔等,仲有電玩世界的「宅男女神」洛兒,搞到伍樂怡成為被杯葛對象。
主持之一嘅林盛斌(Bob)今日接受傳媒訪問,佢話:「完全冇喎,佢哋超好感情,成日一齊食飯,一齊傾偈。」講到有冇覺得對伍樂怡特別好?佢就話:「咁又冇喎,其實班美女學徒慢慢出鏡同表現嘅機會會越嚟越多,煮嘢食係大家輪流煮,冇分大細,今集呢班煮完,下次到另一班,大家機會均等,製作單位不斷開會度緊橋,希望大家都有演出同表現自己嘅環節,等觀眾同網民可以認識佢哋多啲。」
另一主持蕭正楠就話:「每次節目都會俾時間佢哋去表現自己,不過節目時間有限,有啲人唔習慣做綜藝節目,如果俾唔到精彩嘅反應,鏡頭就會比較少,相信慢慢會好啲。」王卓淇亦否認呢件事,佢話:「我哋相處得好好,成日一齊食飯,好開心,每個人都有機會煮嘢食嘅機會,係輪流嘅。」
精選娛聞,喺晒《娛果》
http://fb.com/appledailyent
雖然呢班美女學徒不乏索女,但係出鏡嘅機會唔多。(影片截圖)