小肥、陳慧敏（慧敏哥）同組合MFM等一班歌手，今日去到深水埗西九龍中心，出席十月底舉行嘅「港澳零距離音樂會」記招，身為澳門歌手嘅代表小肥同慧敏哥表示，其實港澳歌手分別都唔係太大，小肥話：「平時盡量發掘好多來自澳門嘅作曲人或者填詞人，希望將佢哋嘅作品擺入自己專輯，從而令更多人認識佢哋。」小肥覺得雖然香港同澳門歌手大家講住同一種語言，但始終接觸嘅生活文化有唔同，所以澳門填詞人寫嘅歌詞的確係有唔同嘅特色。

另外，11月都會舉行演唱會嘅慧敏哥，佢表示已經忙於為演唱會做準備：「心情好緊張，好多謝小肥做我嘉賓，仲有林欣彤等一班好多朋友都話會嚟。」問到演唱會上會唔會騷性感？佢話：「好多人都咁問我，但我要顧及嚟睇嘅朋友嘅感受，所以應該都唔會。」