曾經憑韓片《聖殤》獲得第69屆威尼斯電影節金獅獎嘅56歲名導金基德，今年8月被女演員A某起訴，A某指控於2013年拍攝電影《切夫之痛》（Moebius）時，遭金基德掌摑及強迫拍床戲，事後A某向金基德提出起訴。韓國電影產業工會、韓國女性電影人協會等協會都聲討金基德，指佢侵犯人權。

本月8號首爾中央地方檢察院就案件進行審判，當中檢察院指金基德毆打嫌疑罪成，罰款500萬韓圜（約35,755港元）嘅略式起訴，對強迫拍攝床戲部份就做出無嫌疑嘅判定。

不過A某就唔滿意判決，今日就喺首爾麻浦區韓國性暴力相談所舉行記者會表達不滿，由於A某身份一直未被公開，所以今日記者會上佢就喺屏風後接受記者提問，並再次提及被金基打掌摑及迫拍床戲，對自己留下無法磨滅嘅精神傷害，而佢亦不服判決，並會作出上訴。

更多韓流，喺晒《娛果》
http://fb.com/appledailyent