儘管發展商同代理合力唱好樓市，仍有投資者對後市投不信任票，油麻地樓花盤窩打老道八號，二座高層A業主，二月以二百三十萬買入，奈何樓市回軟，近月該盤價錢有落冇上，於是趁入伙前，以二百二十萬蝕讓予醫護人員，蝕十萬九，半年貶值四點七巴仙，連雜費估計蝕近一成。
蘭西記得，窩八早前都出現過兩宗蝕讓，業主眼見二手放盤二百幾個，發展商又有一手貨尾，驚住下月入伙推埋出嚟頂爛市，惟有及時出貨，輸少當贏。

穗玩具城內購
廣州國際玩具禮品城第一期計劃今季內購，長實袁添鴻話，接到意向書已經超額一倍八，認購總樓面一百八十萬呎，估計第一期可以套現近十億。
袁添鴻話，從收到嘅認購書睇，主要係玩具商，佔六成一，當中四成二屬於普通玩具公司。
準買家有六成半嚟自廣東省，可能因為佢哋最熟悉環境。香港客都有兩個巴仙，台灣客就佔三巴仙。

國中星城快銷
湖南長沙對港人嚟講，唔係好熟悉，不過，國中控股喺當地嘅國中星城第一期「萬國商業廣場」，最近推出首批二十七個舖位，四日內沽清。
買家主要係投資者，舖位一百六十一至六百四十六呎，售價逾十五萬至四十二萬，套現約千一萬。
發展商計劃加推三十個單位，一百四十六至五百四十七呎，售價十五萬餘起，最高八十八萬三。