鄭秀文(Sammi)噚晚喺銅鑼灣舉行《Creo en Mi》MV初見會，現場有過超過300個fans一齊睇MV首播，Sammi喺台上話好好興奮，佢聽到呢首歌嘅西班牙版本幾百次，覺得好好聽，之後拎咗個版權，仲搵埋王嘉爾(Jackson)合唱，成首歌好有力量！

喺MV裡面，有好多場面好震撼，好似其中一幕Sammi被淋紅油，佢話：「睇番個MV好感動，拍嗰陣個心有團火，只係一心想做好件事，呢一幕要一TAKE過，冇得NG，雖然耳仔、鼻同嘴都入晒油，可以話有窿嘅地方都入晒油，事後仲要用好多卸甲水，抹咗好耐先搞得掂，不過真係好值得！」

製作費方面，Sammi就話：「我冇問呀，係唱片公司埋單，不過有70幾人一齊拍，飯盒都要喇，好多謝公司陪我一齊癲，呢個係近年好大嘅budget，對我嚟講仲係好耐未試過做完一件事，令自己咁滿意，o依家個社會要呢啲正能量歌曲，俾人相信自己搵到希望，我要為廣東歌盡力一番綿力。」

精選娛聞，喺晒《娛果》
http://fb.com/appledailyent