除歐洲央行同聯儲局之外,好多央行注資或表明隨時會注資入金融體系,大家𠵱家應該好清楚所謂「信貸危機」係乜嘢,有幾咁厲害。注資入市場係要市場有秩序,同解決次按危機同信貸危機冇乜關係,商業銀行解決咗資金周轉嘅問題,唔代表佢哋會繼續放數畀投資銀行同對冲基金,或者會暫停追數,因為嗰個係信貸問題而唔係資金周轉問題。呢場風暴仲未過去,不過各大央行可能會聯手喺市場搞啲動作,股市將會好波動,呢個肯定唔係搏命嘅時候,大家都係要小心啲。
恒生C輪5695:恒生(011)昨收118.10元,回試10日線買盤積極,下個支持位115元,以恒生嘅前景,115至118元區域應可以吸引基金買盤,恒生C輪5695可炒短線。隻輪昨收67仙,有效槓桿率8.8倍,正股彈上123元,5695應該喺94仙樓上,正股跌穿115元止蝕。