正值暑假，除咗要投奔初夏，更加要衝落水消暑，政府有廣告提醒市民，記得去有救生員當值嘅泳灘！但其實有救生員，就係咪一定安全呢？正所謂夏日炎炎正好眠，呢位救生員哥哥，可能返早未瞓醒，竟然當值期間疑似「釣魚」，仲畀人影晒都唔知！

「有小朋友出事點算？救唔切架喎！」讀者李先生講起仲有啲勞氣，事緣佢8月8日(周三)帶6歲嘅仔仔去黃大仙摩士泳池參加游泳班，喺池邊陪上堂嘅李生，得閒就到處望，突然間望到對住2號兒童池嘅救生員當值處，有一位男救生員坐咗喺度，戴住太陽眼鏡，棟高隻右腳，低下頭，疑似瞓著咗！

「唔理有幾多小朋友游水，當值期間都唔應該瞓覺啦！」由李生提供嘅片段睇到，當時接近上晝9點，雖然泳客唔算多，但都見到有小朋友喺度游水，而個救生員郁都唔郁，因為佢戴住太陽眼鏡，所以睇唔到佢對眼係咪合埋；不過，就算佢唔係瞓緊覺，咁嘅姿勢，都只能望到自己心口，而唔係望住個泳池！片尾部分，一位女救生員行埋黎，疑似瞓覺嘅果位哥仔，終於抬起頭！「我見佢瞓咗好耐，我先舉機影，佢瞓到俾人影低晒都唔知。」李先生批評，救生員當值時瞌眼瞓，簡直罔顧泳客安全。

《蘋果》今早到摩士泳池視察，可見該個救生員更亭對住個泳池，距離約3米。由於泳池水深不到1米，救生員坐在更亭內直視，已經可以望到整個泳池的狀況，而當時有救生員當值，也有數名小童在游泳。

康文署回應話一向重視員工紀律及操守，如果證實有違規情況，會按情序作出紀律處分，署方強調，會安排救生員輪流轉換崗位，避免佢哋長時間喺同一崗位工作。署方現時共有1959名救生員，當中1272人屬長期服務。

你敢爆，我敢獎！ 即Call《蘋果》24小時爆相爆片熱線 ：63836568