西環前日朝早發生咗一宗紅色小巴亡命飛車嘅驚險意外，據報個紅Van司機趕收工，竟然當交通燈冇到，紅燈都照衝，結果紅Van高速撞向前面一部七人車車尾。而紅Van撞車之後仲衝咗成100米先停低。小巴司機受傷之餘，七人車女司機同車上13歲嘅小朋友都受傷，認真累己累人！
事發喺前日上晝6點幾，讀者刁先生揸電單車，駛到山市街同吉席街交界。當時交通燈明明係紅燈，刁先生停喺慢線等轉綠燈，點知就喺呢個時候，右邊快線突然傳嚟「砰」一聲，原來紅Van冇收油，高速撞向停喺燈口前面一部七人車嘅車尾。

七人車捱撞兩傷

七人車被撞到推前十幾米，車尾擋風玻璃全部碎晒，仲撞到出煙，連車牌都甩埋，但小巴喺撞車後仲冇即刻停車，衝前咗成100米先停低。現場消息就話，紅Van司機當時開完通宵更趕收工喎，「最離譜係部小巴撞車後仲唔停車，繼續向前行！」之後交通燈轉綠燈，刁先生於是開車前行，其間佢見到小巴車頭擋風玻璃都碎晒。
警方發言人話，前日朝早6時46分，涉事私家車同小巴先後沿山市街向石山街方向行駛，當駛至近吉席街時兩車相撞。私家車47歲姓劉女司機、車上13歲姓廖男童同小巴55歲姓李男司機都受傷，三人清醒送去瑪麗醫院治理。案件交由港島總區交通部意外調查隊調查，暫時無人被捕。