【曲線要說明】黃秋生評無綫停播港台節目︰咁唔好畀免費牌佢囉
無綫TVB通訊事務管理局黃秋生頭條新聞ViuTV
通訊事務管理局今日公佈,撤銷向本地免費電視節目服務持牌機構發出須播放香港電台節目的指示。根據免費電視牌照條件,現時無綫與ViuTV每周在其綜合中文頻道分別播放3.5小時及2.5小時港台節目。通訊局表示今年1月9日收到無綫提出免除播放港台節目的要求,理由是港台的電視頻道已達全港99%的人口,覆蓋率媲美其他商營電視台。通訊局的決定變相令TVB可以停播近日被警察投訴的港台節目《頭條新聞》。
黃秋生接受《蘋果》訪問時說︰「咁做咩要畀佢(TVB)免費牌呢,咁樣?反正TVB而家都冇人睇啦。」秋生話雖然如此,基於合約精神,TVB最初獲發免費牌,其中一項條件就是要提供時段給政府,他說︰「著數你就攞咗,應該負責任你又唔負,唔係做乜要免費畀你呀,TVB應該要幫政府做返啲嘢。而家邏輯變咗『幫政府做返啲嘢,就係唔幫政府做返啲嘢,就係幫到政府做返啲嘢嘞』,嗰邏輯好亂哩,其實就係『你唔播佢就係幫緊我』。」邏輯正如當年劉德華、梁詠琪主演的《嚦咕嚦咕新年財》中演華仔母親黃文慧的經典金句「你要乜我畀乜你就係誅,你要乜我唔畀乜你就係鬆」。秋生話最簡單理解是免費就要提供時段給政府,既然取消免費時段,就要收TVB牌費錢,他說︰「畀個理由點解要免費畀你,你靚仔啲、好睇啲呀,係咪先。唔播唔緊要,唔好免費牌囉,畀錢囉。」
另外,作為金像影帝的秋生,今早在FB分享演反派的心德,同時「回應」成龍跟PK鄧學做警察︰「演技教室。若要演反派,照住啲乞警嘅言行做一次,包你神憎鬼厭,攞硬影帝。攞獎時記得要多謝人。我攞到影帝都係睇你哋點做差人㗎咋。」
-----------------------------
第三屆最港電影大獎
按此立即投票 -----------------------------