立法會正值休會，下個月中先再復工，唔少政黨、議員都趁暑假外遊或者去考察，身兼行政會議成員嘅新民黨主席葉劉淑儀日前就帶咗廿名黨員，到咗內地梅州考察三日，上周五出發，啱啱喺星期日先返港。呢次考察，新民黨邀請咗中聯辦社工部副部長李運福擔任榮譽團長，及社工部處長彭建新擔任顧問。

據知葉劉想喺港島區補選派陳家珮上陣，為部署下屆接班做好準備，趁呢啲時間同各方、尤其西邊打好關係，確實無往而不利。

睇返新民黨呢次嘅行程相當緊密，包括參觀中國客家博物館同歸讀公園人行浮橋；第二日就參觀梅縣外國語學校、梅縣文體中心、富力城等，晚上更獲梅州市政府接見招待，共享晚餐；最後一日往梅縣雁洋鎮，參觀考察葉劍英紀念園、橋溪古韻同埋雁南飛。