曾演出過《漂亮男人》、《鄭道傳》等韓劇嘅女星金敏珠，於2010年同年長19歲嘅製作公司Eight老闆宋秉俊結婚，雖然當時好多人都唔睇好呢段年紀相距成廿年嘅婚姻，但係佢哋都唔顧反對而結婚，婚後佢哋都有不時出席公開場合，表現好恩愛。

不過今日韓國方面卻傳來消息，金敏珠同宋秉俊宣佈離婚，其實佢哋喺去年年底已經協議離婚，原因係性格不合。雖然現時佢哋已經唔係夫妻關係，但所謂再見亦是朋友，佢哋不時都會出嚟傾下啲新作品，因為宋秉俊間公司曾製作多齣經典韓劇，包括《花樣男子》、《茶煲阿四》、《宮》等，所以佢哋都會互相交流吓工作上嘅嘢，不過佢哋嘅身邊朋友得知呢個消息後就話覺得好遺憾。