現年66歲嘅劉永，於1971年入行，成名於佢喺邵氏年代拍咗李翰祥執導嘅電影《乾隆皇奇遇記》，演乾隆皇下江南，之後佢一炮而紅，再拍咗一系列《乾隆皇》電影，所以劉永有「皇帝小生」之稱。眨吓眼，劉永唔經唔覺做足「皇帝」40年。

劉永早前喺觀塘接受《蘋果》訪問時，嚟咗段自我介紹：「人哋叫我『皇帝小生』，30年前我又拍咗《秦始皇》，到o依家陸陸續續都仲有人搵我做皇帝。除此之外，表演唱歌、舞台幕台都有，總之同演藝有關嘅都會做。近日返咗香港拍港片，之前喺大陸開咗間製作公司。」

講到演皇帝嘅心得同好處，劉永笑言唯一好處係拍戲嘅時候可以坐喺度做，舒舒服服有人服侍，佢笑笑口話：「如果做大臣，好辛苦，因為我啱啱接咗一套做大臣嘅戲，跪住講對白，講完對白可以『平身』，但企都企唔到起身，因為跪得太耐。」

曾經係邵氏當紅小生，當紅時試過忙到3個月冇掂過張床，劉永話：「我試過3個月冇碰過睡床，早上一部戲、中午一部、晚上又一部，一日3組，喺邵氏做親都係主角。嗰時拍戲，打光都要兩個幾鐘，就趁嗰段空檔喺度瞓。」

做完皇帝離開邵氏之後，加入亞洲電視都係做皇帝，演《秦始皇》一劇同樣大受歡迎。紅足10多年，高潮過後，經歷人生低點，金融風暴加上婚姻問題，劉永有點無奈：「我好緊張家庭，同家庭生活唔愉快。又97又回歸，清水灣間別墅都賣埋。我幢別墅，淨係裝修都過千萬。嘩，你知唔知道負資產有幾辛苦？嗰時完全唔想留喺香港，就返咗內地。都冇喇，冇得話可唔可惜，人唔可以強求。」

不過採訪當日劉永戴嘅「金撈」金鋼GMT-Master II，等閒都要10萬左右，早年回歸內地拍劇嘅劉永自稱「老牌新人」，山大斬埋有柴；喺內地有車有樓，早前劉永工作室喺內地開張，創業作係60集網劇《南海‧四大名捕》。除此之外劉永都有接拍香港電影，作品包括近日上映、同惠英紅、任達華主演嘅《MRS K》同麥浚龍執導嘅《風林山火》。