荷李活影星尼古拉斯基治（Nicolas Cage）以明星大使身，今日中午喺澳門出席「第三屆澳門國際影展暨頒獎典禮」記者會，一身灰色西裝亮相嘅佢作風親民，記者會上拍照時表情及動作多多，佢表示幾年前已到訪過澳門：「我很喜歡這裏，有很多獨特的建築物，是日後退休長住的好地方。」

尼古拉斯基治係首次參與呢個影展，佢話好感恩觀眾都喜歡佢嘅電影，直言希望同澳門導演合作：「無論小型或獨立電影都可以，時間和錢不是重點，人生很短暫不要想太多，喜歡就去做。」

講到曾合作過的華人導演，他稱最鍾愛吳宇森（John Woo），兩人曾合作嘅《奪面雙雄》（Face/Off）亦令佢印象深刻：「John拍攝每組鏡頭時都會擺很多不同的機位，每一部機都會細心去睇，非常嚴謹認真亦很注重細節，不時會叫我坐直點，其實我都喜歡李安導演，但最愛還是John。」

Nicolas亦曾跟彭氏兄弟合作，到泰國拍攝《無聲火2.0》，佢分享拍攝時嘅趣事：「因他們外表很相似，拍攝時我經常分不出他們，他們亦知我認不出，有時會故意混淆我。」

另外，Nicolas新作《Mandy》內演出一個要替太太報仇嘅角色，佢透露原本係飾演另一個角色，但因為實在太鍾意男主角，所以成功爭取：「我將懷念父親的感受注入角色，因為太投入，拍攝時都不和其他人說話。」

精選娛聞，喺晒《娛果》
http://fb.com/appledailyent