恒隆集團主席陳啓宗早前指前綫劉慧卿喺一次港大演講會中，派發陳太競選單張做法唔妥當，卿姐話絕冇此事，陳啓宗老屈令佢火都嚟埋，要求對方公開道歉，甚至願意公開對質，討回公道。
八方好支持陳啓宗踢爆虛偽政客，但唔知點解，陳啓宗至今都係得個講字，拎唔出真憑實據，咁就輪到卿姐發威嘞。當日邀請卿姐去港大演講嘅政治與公共行政學系客席副教授A.T.Reyes，喺美國公幹回港，知道呢單風波後挺身而出，證實卿姐當日只係派介紹前綫單張，冇幫陳太助選。
卿姐有人證，即刻通知陳啓宗，叫佢就失實指控道歉，仲寸多一句，話將來要公開指摘其他人，應該有真憑實據先開口，唔好信口雌黃。陳生，俾卿姐咁寸你都忍得？快啲拎證據出嚟反駁啦。