笑料創作人的人生一樣搞笑，無綫電視遊戲節目《一觸即發》及《一筆OUT消》的劇本及資料審閱陳敏生，四十六歲之年渴望可以實現夢想，利用傳媒的力量，把中國民生面貌介紹給全世界。要實現夢想，他決定由包裝自己出發，第一件事要改變自己的babyface（娃娃臉），去年十月找朋友以一百六十元替他染髮：「我係想染到好似魯平咁嘅灰白色。」
染髮顏色調控難度極高，國務院港澳事務辦公室前主任魯平令人印象深刻的一頭灰白髮原來不易模仿。陳敏生的頭髮最終變了淺金帶灰，一派中年金毛的模樣。「我一返工就俾同事笑，話我係BBC嘅卧底，走嚟昅住TVB有冇做衰佢哋嘅《TheWeakestLink》（一筆OUT消）。」染髮行動成為陳敏生辦公室的笑話：「第一日笑，到第十日就唔會再笑，但係我會變得好outstanding（突出），啲人見到我，會諗呢個儍佬係邊個呢？」

「世界唔了解中國」
這個「儍佬」七六年在荃灣全完中學中七畢業後，在《華僑日報》當了兩年新界版記者，之後一直在香港電子傳媒任職資料搜集及創作，曾參與八九年《點解咁好笑》及九○年《笑聲救地球》的「度橋」工作。
九三年他應張耀榮及陳友邀請，到廣州城市傳播公司出任創作總監，負責訓練二十多名來自全國各省市的大學畢業生參與電視創作工作，首次深入接觸到內地人，自此觸發他了解內地生活的興趣。
有一次，陳敏生想教他們創作笑話：「我想用Beatles（披頭四樂隊）做核心度個笑話，點知全班二十五人冇一個知Beatles係乜。」這令他體會當時的中國情況：「世界係唔了解中國，中國亦唔了解世界，我覺得我係一個傳媒人，又懂包裝技巧，我有一個意念，想將中國民生面貌、流行啲乜，介紹畀香港、台灣甚至海外嘅中國人。」