發哥周潤發平日生活都好平民，經常去行山、行街市，又會坐公共交通工具、食地道美食。最近喺香港忙緊宣傳新戲《無雙》嘅發哥，呢日接受鳳凰衛視《魯豫有約：說出你的故事》嘅專訪。發哥帶住主持人陳魯豫先後上飛鵝山遠足，又搭港鐵同天星小輪，再去九龍城品嚐地道美食，帶觀眾感受下發哥嘅日常生活。訪問中發哥仲笑言自己嘅電影百分之九十都係爛片。

講到電影票房，發哥就話從來都唔介意自己早期係「票房毒藥」，發哥話：「每部戲都有命，唔一定表現得好觀眾就喜歡，可能一部戲演得很爛佢哋都喜歡。我演過嘅爛片佔百分之九十，好嘅唔到一部、兩部。雖然好多電影唔係很好，但作為演員我盡咗本分，因為很多時候要跟導演配合，把導演嘅要求演出來，收工才能攞到薪水。」佢笑言：「演得爛但演得很好，因為爛嘅戲好難演，要演得爛係好難。」

早排講咗會裸捐嘅發哥，身家豐厚，但對於拍戲收片酬一事，就有自己嘅睇法。主持人陳魯豫問，能唔能夠唔收錢拍，一定能獲獎嘅電影，發哥說︰「肯定唔會。」雖然成立基金會，未來會將錢捐出，但賺錢及片酬係一種形態，係該有嘅過程，每個人都應該守規矩：「我依然有賺錢嘅動力，賺錢係規矩，動力係演戲。放錢到基金唔係動力，演戲才是，演戲係心中嘅興趣。」

因享受演戲，發哥唔計較獎項得失：「重要嘅係過程，演戲已經樂得不得了，冇攞到獎亦冇失望過。導演話cut嘅時候，就攞獎了，喺環境裡頭，已經攞到最好嘅。拍戲最終嘅目的係要生活、要食飯，唔係為攞獎。」發哥始終認為電影係一門生意，談不上係藝術：「香港係個好現實嘅地方，要求你表演，拿到票房。跟著呢個方向走就行，不需想太多。」

專訪中，講到發哥嘅感情世界，佢表示自己好花心，對每個美女都欣賞。他喺電影中講過好多次戀愛，雖然戲係假，但投入嘅感情係真啲，觀眾透過螢幕睇表演，相信發哥喺電影中，表現出嘅係真愛。

喺電視台時，鄭裕玲跟發哥演得最多對手戲，發哥提到有兩年時間，每日擘大眼，第一個就見到鄭裕玲，兩人嘅關係，既係朋友，又係女朋友同老婆 (劇中)，很甜蜜。發哥又對冇睇過佢電影嘅觀眾推介《秋天的童話》，因為佢喜歡故事中嘅簡單愛情，不華麗，貼近生活。講到生命中最愛，發哥就話係母親同太太。

發哥喺訪問中，再次回應喪女之痛，指自己當時好快就釋懷：「因為兩個人同傷悲，對任何一方都沒有好處。我只有不停的鼓勵太太。當時我處理壓力嘅方法好簡單，就係做運動、爬山，出出汗就好。最重要係性格，我特別樂觀，什麼都唔睇重。」發哥最喜歡電影《臥虎藏龍》中一句對白︰「把手握緊，裡面什麼也沒有；把手放開，你得到的是一切。」發哥形容自己依家係開朗、開心、有活力嘅人，未來目標係要成為更年輕嘅周潤發。

精選娛聞，喺晒《娛果》
http://fb.com/appledailyent