RubberBand今日喺灣仔舉行《RubberBand Hours音樂會》熱身唱，獻唱第8張專輯《Hours》內新歌外，更宣傳9月26日假Star Hall正式舉行《RubberBand Hours音樂會》，會場提供手工啤酒及小食營造氣氛似Happy Hour感覺，四子更即場投票揀選能代表佢哋嘅手工啤味道。

揀9月26日喺Star Hall開騷係有特別意思，十年前嗰日係佢哋推出首張專輯《Apollo 18》，而Star Hall係佢哋首個開騷場地，佢哋一年前已經申請場地，並無遇到困難，但衷心感激一班製作單位得知佢哋諗法後就積極去申請。演唱會構思仍待開會傾談，6號話:「要令到樂迷無得抖，一齊唱到尾，不論係hit song與否，因為知道入得嚟嘅都係已經識咗十年嘅老朋友，十年嚟有近百隻歌，要花時間去揀歌。」

嘉賓方面，問阿正會否叫太太黃淑玲上台唱？佢話:「幾好問題，返去傾下。」阿緯指鍾意就一齊玩，泥鯭透露當年第一個騷幫手做和音嘅小肥自薦嚟玩，佢哋表示同小肥當初不停跑校園騷，試過得十幾人睇，當中有學生原來係想搵黃柏高合照。另外嘉賓人選未定，不過合作過嘅吳雨霏同方皓文都變成人母。

門票聽日起網上發售，假如大家湧躍支持會加埸，而9月27日係6號38歲生日，所以頭埸反應好會唱過零晨12點。6號指十年前仲係o靚仔時寫唔到o依家嘅歌，o依家亦寫唔番以前青春嘅歌，所以希望喺今次演唱會入面畀大家感受下，過去嗰十年自身嘅經歷，同成長路，希望大家可以感受到當中嘅脫變。

精選娛聞，喺晒《娛果》
http://fb.com/appledailyent