蔡依林（Jolin）同周杰倫（Jay）呢一對，雙方由開始到結束都冇正式承認過，不過早喺年半前，台灣女主播侯佩岑嘅介入，搞到兩人分手收場。最近Jay又被指搭上組合S.H.E嘅成員Hebe，消息曝光後，今次輪到侯佩岑提出分手。
兩次分手Jay都處理得唔清唔楚，令到女方受傷害。幸好如今Jolin有小豬羅志祥呢個觀音兵，侯佩岑近日就被傳同蘇慧倫嘅前男友、張震嶽經理人黃靜波撻着，咁都冇咁傷。

曾想報復

Jolin近日接受所屬公司官方網站（www.supermars.com）裏面嘅《大明星週報》訪問，終於開腔講番感情受創嘅經歷。雖然佢冇開名講係邊個，不過明眼人都估到佢係講緊Jay。Jolin話：「當我知道這段感情已經走到盡頭時候，我一直不敢說分手，只是對方一直不講話，最後只好由我自己主動問他：『那現在是要分手嗎？』而對方也就默認了，我整個人很錯愕！」Jolin仲話提出分手當日佢同朋友睇緊戲，睇睇吓就走咗出去講分手。
訪問中Jolin話分手之後曾經諗過報復，但到最後關頭又忍住，佢話：「詛咒對方是一定要的啊（笑），不過都只是想想，還是希望對方幸福，因為愈氣就顯得你在乎對方……。」
訪問出街之後，引來議論紛紛，日前Jolin喺台灣拍攝麥當勞廣告，記者問佢訪問中講嘅負心漢係咪Jay？佢即刻面色大變，冇否認亦冇承認。