朗尼同高蓮首次以夫妻身份過聖誕,自然不甘寂寞,合共使咗30萬鎊互送禮物,而且好心有靈犀㖭!原來,朗尼參加世冠盃前喺屋企附近間珠寶店,用7萬鎊買咗個鑽石勞力士錶,作為老婆嘅禮物。之後,高蓮竟然去同一間舖,用8萬鎊買咗個PANERAI手錶送番畀佢。
呢對浮誇夫婦嘅友人講:「佢哋想畀個驚喜對方,估唔到去咗同一間舖,到咗交換禮物先發覺!」大家係咪覺得佢哋好浪漫呢?我求大俠覺得嘥錢就真,朗尼今個聖誕仲買咗部15萬鎊賓利,同埋白金頸鏈畀高蓮,唔通要咁重手嘅禮物,先可以表達情深義重?
從曼聯球星嘅消費心態,可見球壇財富分佈不均嘅毛病。班主、球會、球迷窮到死,球星繼續風流快活,共度時艱?睬你都儍!