今日好多嘢分享，入正題。首先，我呢十幾個月來叫大家不問價追嘅彩星玩具（869），喺尋日舉行董事會，應該就係要通過全年業績。不過，喺落筆呢刻，未見出台，唯有下週再交待。等唔切嘅，我會喺我FB到，即時短打分析。

禮拜一，恒指跌七百。一條長長嘅陰燭，而唔係裂口低開橫行。主要原因，係啲好消息，例如美股上週臨尾抽升、德國麥媽繼續做總理等，一開波令人開心。不過啲壞消息，例如特朗普「貿易平等」舉動、意大利選民基本上選咗脫歐做大多數，就係慢慢滲出。

建制失勢之勢，全球繼續。因為建制偽善嘅證據，越來越多人覺悟。打着民主旗號嘅歐盟，就係反民主。鬧特朗普打貿戰嘅國家，全部收嘅關稅都多過花旗國。而高呼愛國愛黨的，啲領導就個個揸或想揸外國護照。

連我最支持司長陳茂波嘅守財奴政策，都喺後門開咗好多一炮輸大錢嘅高鐵式「投資方案」。難怪我哋香港人已淪為澳門人，係咁要求派錢。因深信橫掂都會敗晒，不過分家產。

而大家都知，財政儲備就係我哋兩制最後防線。即大家嘅理性要求，其實只係反映我哋全部已見到香港嘅終點。

最後，美元一個月銀行同業拆息，升勢加速。香港樓市我唔估價，我估成交量。香港銀行同業拆息，到依家仲好低，不過一郁嘅時候，就會學股市二月時嘅速度。到時，就係吓啲「剛性需求」有幾剛。聯儲局唔通真係撥亂反正，將最終極嘅偽善結束？賭錢輸咗，唔通將會冇人叫你做「苦主」救你？

孫柏文