我求大俠細個好鍾意同啲有錢仔一隊踢波，事關往往贏波之後，佢哋都扮晒大佬請飲汽水請食雪糕。原來效力國際米蘭嘅前鋒伊度奧都好鍾意扮大佬，喀麥隆國家隊擊敗摩洛哥取得世界盃決賽周資格後，呢位隊長就向24位入選大軍嘅隊友，各派一隻值29,000鎊（約37萬港元）嘅鑲鑽金錶作為獎勵，加加埋埋差唔多成900萬港紙，認真大手筆。
伊度奧今次可以講話轉死性，事關之前未轉會國際米蘭前，一直同巴塞隆拿傾續約企到好硬，要求同美斯一樣人工先肯續約，巴塞當然唔肯，結果佢就成為伊巴謙莫域轉會嘅籌碼，睇到伊度奧份人對錢都好緊張。
4年前世界盃外圍賽喀麥隆以3:2擊敗科特迪瓦，雖然最後都出唔到線，當時伊度奧都豪派咗35,000鎊（約45萬港元）畀隊友，每人都有15,000蚊港紙落袋，今次加碼成20倍，肯定有「陰謀」！

自家品牌當做宣傳

原來伊度奧送嘅金錶，唔係「勞記」、「卡記」或「爵爺」，而係佢嘅自家品牌。錶面就有大大隻「Eto'o」字樣，戴上身又點會感受唔到呢位偉大隊長對隊友嘅關愛呀！到時世界盃，肯定有機會都要做畀隊長射先。之前伊度奧都送過同款錶畀牙買加跑手保特，今次只不過舊橋循環再用啫，家各大非洲同歐洲傳媒都廣泛報道伊度奧嘅豪氣，單單廣告費都唔止幾百萬啦！
講真喀麥隆陣中，好似謝列美、桑治、伊高圖等都先後效力英超球隊，人工都唔少，未必貪伊生隻錶；隨時自己嘅私伙嘢都靚過佢。既然伊生派錶唔討好，都係好似以前咁，直接派錢好過啦！