花生友休息一輪，係時候趁選戰開始，復出陪大家觀戰剝花生！特區政府喺提名期之前，突然「僭建」確認書，要求參選人要簽署擁護特別提出嘅3條《基本法》條文，用意係乜，相當明顯，一如所料成為今屆選戰焦點。而提名期開始至今，幾乎除建制派及熱血公民鄭錦滿外，冇泛民及本土派簽署。唔簽又有乜後果？嘿嘿……無論有同冇，對泛民都係有着數。

隨時變最好助選議題

點解花生友咁講呢？乜唔係想阻止本土同港獨派入閘咩？有泛民綜合各界意見同花生友打賭，話呢張確認書，縱然無超越法例要求，卻明顯唔喺訂明嘅相關參選程序之內。
雖然話選舉主任可以按法例及相關情況，決定批唔批相關參選人入閘，但若然有政治智慧，大選前梗係多一事不如少一事，唔通因為冇簽確認書，嚴禁泛民或本土派入場？嘩，如果係咁，相信泛民同本土派講多謝都嚟唔切，仲唔係最好嘅助選議題，政府打壓，又有一例喎？
花生友問過部份建制派，唔少人直指確認書好多餘，畀咗個選舉議題泛民，何必呢？話唔係梁振英想做嘢畀阿爺睇都冇人信喎！花生友都相信，呢張紙都係姿態大於實際，據聞梁班子係好想選民睇清楚，邊啲人支持港獨或自決，之但係佢哋又知唔知，CY治下提出嘅任何嘢，到頭來只有反效果？主流泛民今日約見選管會主席馮驊，花生友都好想知馮驊點解畫！

花生友
周二、四刊出