當年今日
關於我們

馮仁昭四圍超:拿督永懷陳儀馨許諾不續弦

蘋果日報 2006/08/08 00:00


曾經喺《歡樂今宵》飾演「得意妹阿妙」為觀眾熟識嘅陳儀馨,因為乳癌擴散,大前晚去世,終年54歲。佢喺大馬嘅丹斯里拿督丈夫楊肅斌,噚日一臉倦容同記者交代亡妻嘅身後事,仲強調今後唔會再娶,因為佢之前應承過太太唔會咁做,加上佢𠵱家要將所有時間照顧五個仔女,佢仲講笑叫嗰啲將佢列為結婚對象嘅女士唔使再考慮佢。
舊友齊惋惜
楊肅斌提及幾個月前太太原本喺倫敦接受治療,一日佢靜靜搭飛機返咗吉隆坡,對於一個接受緊癌症治療嘅人自己坐長途機返屋企,楊肅斌覺得亡妻好堅強,佢又話太太去世當晚好似預料到自己即將離開人世,當晚全家人食完晚飯,太太分別送咗唔同嘅禮物畀家人,同大家講完晚安之後就靜靜離開人世。
此外,陳儀馨生前喺EYT合作過嘅李香琴、盧海鵬、譚炳文同邵音音,聽到佢去世嘅消息都表示可惜,琴姐話:「同佢好熟,我之前去新加坡玩佢都好好客請我哋食飯,仲免費住喺佢哋嘅酒店。」鵬哥就話:「我以前去馬來西亞做嘢去過佢屋住,知道消息心都哽住,佢份人好積極,咁有錢都親力親為㗎。」邵音音噚日出席公開活動時仲一度落淚,而譚炳文就話唔會去參加喪禮,但會做帛金同送花圈。
empty
陳儀馨生前同丈夫親密合照,可惜已經成為歷史。
empty
楊肅斌(右一)噚日陪同政要大臣瞻仰亡妻遺容。