象徵中國人拒絕遺忘歷史嘅民主女神像，唔知由幾時開始，竟然成為好多人眼中釘，先遭警方扣押，想落戶中大，卻被校方以所謂保持「政治中立」做藉口而拒諸門外，真係豈有此理！中大被喻為「香港早稻田」，因為師生、校友比較傾向反建制，好多師生對錢穆教誨手空空無一物、艱苦我奮進嘅精神莫失莫忘，卻唔知道原來中大有「政治中立」傳統。

當年高錕帶頭譴責北京

有校友話不政治中立可能先係中大傳統，否則創校嘅多位學者、大師，何需南下避禍馬料水治學？遠的不說，就在21年前，中大高層由校長高錕帶頭，連同副校長徐培深、四間書院、五個院長等共14個領導層，聯名在報章刊登譴責北京武力鎮壓民運嘅聲明。
按照今時今日中大高層說法，當年大學最高決策階層人物，可能都違反所謂「政治中立」。面對大是大非，選擇面對良知，還是靠攏權貴，現任校長劉遵義好應該公開解釋、畀個交代，否則中大失落傳統、淪為學店，收再多尖子、校園擴充到深圳，都只不過係職業訓練所罷了。身在台灣嘅前學運領袖王丹，批評中大校方「保持政治中立」言論極為荒謬，佢指打壓悼念六四已經係站了在中共一方，「這樣的校長，怎麼為人師表啊？」

港鐵提早一星期貼告示

幸好香港仲有好多人將六四記在心頭。有人上星期喺港鐵銅鑼灣站見到一張告示，內容係話6月4日維園有燭光集會，今晚7點起銅鑼灣站有人流管制措施，網民認為呢張係非一般告示，似乎係暗中提醒大家今晚要去維園，估唔到港鐵都毋忘六四。八方致電銅鑼灣站查詢，站長承認一星期前貼出呢張告示，強調唔係特別做法，「每年都係早一個星期左右，提醒乘客有特別安排。」
雖然港鐵成個禮拜前提醒大家，原來仲有好多人唔知今晚發生乜事，八方溫馨提示大家，六四21周年燭光集會今晚8點維園舉行，華叔壓軸發表講話。

mailto:[email protected]