波歷克同舒夫真高喺上季好高調咁加盟車路士，換嚟嘅只係得英超聯亞軍。今季佢兩位大人物仲衰，直頭因傷一場聯賽都未踢過；波歷克就更加因為足踝受傷關係，搞到俾領隊摩連奴喺歐聯分組賽剔除埋佢個名㖭！唔怪之得，我求大俠噚晚好似喺倫敦街頭，見到摩帥揸住架垃圾車，「兜」住佢兩個返酒店啦！
我求大俠唔係有心針對車路士，但我不嬲有嗰句講嗰句，希望車仔嘅球迷多多包涵。之但係咁，波歷克同舒夫真高喺上季聯賽已經唔係踢得好，佢兩個仲要成個「藥煲」咁，郁啲又周身傷。

歐聯分組賽名單冇份

唉！唔通我求大俠噚晚唔係眼花，搞到摩連奴都冇眼睇，要車佢兩件木乃伊返酒店長唞？嘩！「軍刀」同貌似荷李活影星麥廸文嘅波歷克，周薪加埋以400萬港港元計，成日咁唞點對得住車仔班主同球迷呢？
不過話時話，車仔一向出開鐵人1至28號，好似林柏特、泰利同杜奧巴等個個打不死嘅，點知波歷克同舒夫真高加盟之後，上述3位鐵人經常輪住受傷，佢兩個係唔係黑腳我唔敢講，我淨係知季初泰利同杜奧巴傷完之後，近排又到林柏特受傷啫。
波歷克冇份打歐聯分組賽就梗㗎喇！不過佢嘅球迷都唔使擔心，只要車仔可以打入8強淘汰賽，賽制上係容許佢哋加番波歷克個名。但係到時呢位德國國家隊隊長仲係唔係休養緊，我求大俠就唔知喇！