近來最熱門話題當然係魔術鹹豬手事件，一直有指郭羨妮都係受害者，曾經俾對手抽過水。前晚郭羨妮、郭晉安同胡定欣等到尖沙嘴出席無綫新劇《古靈精探2》煞科宴，問郭羨妮係咪曾經俾魔術手博懵？佢話：「從來冇發生過，我一向都好小心，拍親密戲一直都好小心保護自己，我絕對唔係受害者。」
郭羨妮話如果遇到鹹豬手，一定唔會啞忍，佢話女仔一定分到有心定無意。咁究竟咁耐以嚟有冇俾人博過懵？佢話：「之前試過返內地拍劇，有場戲要騎馬，個內地工作人員唔知我識騎，佢扶我上馬時竟然摸我patpat，我好嬲當場鬧佢，叫佢唔好再搞我同掂我。」

「同蔡子健唔熟」

唔少男藝員被指係魔術鹹豬手嘅嫌疑人物，郭羨妮話只要冇做過就清者自清，今次件事都令女同事有個警惕。講到蔡子健都係嫌疑人物之一，郭羨妮話：「我同佢有合作但唔熟，總之一切小心處理，𠵱家啲男藝人識玩魔術都最好話唔識。」
同場嘅郭晉安話件事好似禽流感咁傳得越嚟越大，佢仲講笑話唔知幾時輪到佢喎，不過對男女演員拍戲一定有影響，安仔解釋：「𠵱家啲男演員同女演員做戲時可能會好避忌，咁反而會影響演出。」
胡定欣就話有時女仔俾人博懵唔敢出聲，係怕人哋以為自己博宣傳。佢又力撐蔡子健係好人，又話冇遇過鹹豬手：「總之我喺公司冇遇過，但係唔想遇到。」