【再演武則天】買唔到劉德華演唱會飛 劉嘉玲舉手﹕我做嘉賓得唔得?
劉嘉玲劉德華武則天徐克
電影《狄仁傑之四大天王》昨晚喺金鐘舉行首映,導演徐克及飾演武則天嘅劉嘉玲,同製片施南生均有現身出席,活動上安排導演即席揮毫,寫出「四大天王」四個大字,並由嘉玲蓋印。
今次已經係狄仁傑系列嘅第三次合作,徐克表示每次同嘉玲合作都有新火花,而嘉玲就表示:「平日同徐克好少見面,佢好少出街,淨係開工先會見到,佢睇住我大,每次見面都同我做心理輔導,不論工作、生活同感情上都係一位智者。」徐克大讚嘉玲好懂得招呼朋友,每次見面都好開心。嘉玲稱戲中三位男演員對導演充滿敬畏:「所以特登安排大家多啲食飯飲酒,傾吓工作以外嘅事,等大家熟落啲。」
電影中有一幕講述嘉玲飾演嘅武則天,色誘趙又廷演繹嘅狄仁傑,嘉玲笑言:「嗰場戲所有嘅動作都由導演親身指導,佢教嘅肢體動作相當妖艷,你睇佢以前拍《青蛇》、《上海之夜》就知,佢平時肯定係一個活色生香嘅人。」又笑言如日後有機會拍武則天嘅閨房樂,嘉玲自己同導演都要再多做功課。問到兩人會唔會再有機會合作,嘉玲話:「導演有好多諗法,佢有新劇本自然就會搵我,我哋唔使成日見面好有默契。」徐克喺旁邊就笑言:「嘉玲請食飯我咪出嚟囉。」
呢兩日全港市民都喺網上瘋狂搶購劉德華嘅演唱會門票,然而,買唔到嘅係佔大多數,原來嘉玲都係其中一份子,佢對住傳媒嘅鏡頭講:「劉德華你啲演唱會飛我買唔到,我依家差成30張飛,咁點算?」 而早前華仔喺記者會上呼籲各人,有意擔任演唱會嘉賓嘅要主動向佢聯絡,問到嘉玲會唔會叫丈夫梁朝偉做嘉賓?嘉玲話:「呢啲等佢哋自己私下傾啦,我只係傳達人。」
記者稱如果偉仔肯做嘉賓,到時咪唔只有三十張飛囉?嘉玲反問:「如果我做得唔得?我唔唱歌淨係上台打招呼?如果唔得我真係要考慮出賣佢啦。」又向徐克表示:「導演你搵番劉德華返嚟拍戲咪有飛囉。」
精選娛聞,喺晒《娛果》 http://fb.com/appledailyent
劉嘉玲投訴劉德華演唱會飛難買,考慮出賣老公梁朝偉,叫佢幫手做嘉賓。2(攝影﹕葉君海)