蓋世寶今日到筲箕灣一新樓盤，為開電視節目《夠細奇則》任嘉賓，與設計師一起討論納米樓空間，如何讓單位變得更實際。

蓋世寶現時自由身，可任意和不同媒體合作，她感覺比以前在大台舒服，和一般離巢藝人有同感，並說：「可以接觸更多唔同工作同範疇，唔使人哋打嚟搵我工作，我要話畀佢聽唔出得鏡，但日前出席活動個個台都訪問我，就係無綫冇囉。」

蓋世寶在香港已經置業上車，現住物業是人生第二層樓，她解釋：「第一層樓係03年沙士時由媽媽協助下買咗，60幾萬，後來因為養狗，每次放狗都好似做賊，終於都搬去租樓住，租樓都好多波折，到最後2014年再置業，比起現時樓價正常少少，所以唯一心願係供甩層樓。」面對今時今日瘋癲樓價，蓋世寶力勸大家：「可以申請公屋就申請，點都快過你買樓。」

供樓有壓力，現時蓋世寶一力支撐，若有男友可以分擔？她說：「我經常都諗，但我唔贊成拍拖就同居，同居就係要結婚，比較保守，而且唔知幾時先搵到，可能人哋要求高，唔揀我。」不過都好期望有人分擔，她說：「真係嫁咗就唔使share啦，希望佢供寫我名，我真係冇乜人追，呢個年紀同男性一傾偈就講結咗婚有仔女，仲使諗！」有朋友曾介紹船河和飯局，但蓋世寶拒絕出席，認為有錢就冇愛情。

--------------------------------
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9