「萬人迷」碧咸42歲依然咁型佬，舉手投足都係焦點所在，周四佢就同14歲囝囝Romeo去咗欣賞ATP英國皇后會盃網賽，見兩父子搭晒膊頭又影selfie，睇嚟相當享受比賽。不過，皇后會盃網賽今屆大吹冷風，梅禮、華域加、華奧歷同泰桑高全部出晒局，咁邊場戲碼得到碧咸賞識？竟然係兩位非種籽球手、美國嘅基利對住澳洲「梅禮殺手」佐敦湯臣，結果呢場比賽亦冇令碧咸等在場觀眾失望，雙方激戰兩小時11分鐘後，基利最終以7:6、3:6、6:3擊敗湯臣，同施歷、狄美托夫、貝迪治等晉級8強。

同日ATP哈雷網賽，3號種籽日本嘅錦織圭喺16強面對俄羅斯非種籽球手卡查諾夫，首盤落後2:3時因傷退賽，同2號種籽迪安齊齊出局，但頭號種籽費達拿同4號種米施華利夫就順利晉級。