鄭裕玲被指睇死周星馳唔會紅 N年後終澄清:好嘢總有人發掘
鄭裕玲周星馳電影賭霸
周星馳曾經捧紅不少星女郎,亦曾跟梅艷芳、張曼玉、林青霞、劉嘉玲、袁詠儀等當時得令女星合作,但名單卻獨缺鄭裕玲(Do姐)。江湖傳聞,當年周星馳在TVB電視劇《天龍八部》扮演遼兵甲,有日在公司偶遇當家花旦Do姐,就向對方請教,問她覺得自己會唔會紅?Do姐就答:「路人甲永遠唔可能成為主角。」
之後星仔變了星爺,但貴為金像獎兼金馬獎雙料影后兼被
封為「鄭九組」的Do姐,卻只跟星爺在《賭霸》及《豪門夜宴》中同戲出現,而星爺在《賭霸》只是客串出鏡幾十秒,跟Do姐完全沒有對手戲。有傳兩大巨星積怨甚深,事隔多年,日前Do姐在商台節目《口水多過浪花》中開腔澄清:「我真係冇講過。」
Do姐指當年睇《430穿梭機》,已經覺得周星馳做主持好得意:「同人哋表現方式唔同,又喺度搞啲細佬,搞到人哋喊。」之後周星馳加入戲劇組,兩人曾合作劇集《生命之旅》,Do姐說:「好嘢總有人發掘,於是調咗佢出嚟戲劇組,嚟咗我哋部劇集,佢同萬梓良好多戲,同我都有少少對手戲。有時佢都會同我傾下偈,之後就有個是非出咗嚟,咁我就要平反啦!」
Do姐坦言當年周星馳的確曾找她問意見:「有次等埋位佢問我做演員有冇前途,但可能周圍有人聽到我哋個conversation(談話)就加鹽加醋,識我咁耐,我係一個會話人唔得?我到今時今日都記得初初出嚟做新人個感覺,我記得我係話『你好有potential,好有潛質,畀心機做呀』咁樣,我諗多數都係咁樣講。點知傳下傳下話『你不如唔好做』,變成咁,何況我係真心覺得佢係好好。」
周星馳在《賭霸》客串演出,跟女主角鄭裕玲冇對手戲。(電影截圖)
鄭裕玲和周星馳亦曾合作群星演出的電影《豪門夜宴》。(電影海報)
鄭裕玲日前在電台節目中否認曾得罪星爺。(網上圖片)
-----------------------------
-----------------------------