今日書展開鑼，除咗睇囡囡之外，仲有囝囝——陳偉成、黃俊豪、姚淇瀚、鍾志峯四子聯手《G.Y.M.動起來》，宣傳活動於中午十二點喺會展舉行，唔知點解搵咗梁齊昕做嘉賓喎……CY女空降書展，都令人OK期待嘅。但係呢，梁齊昕就比預期遲咗一個鐘先到，身穿Moschino嘅Onepiece及膝裙，仲露出黃色底底添，咁唔小心嘅……

梁齊昕由三個保安護駕進場，戴上黑超，紮起頭髮，樣子似乎有點「渴睡」……即係未瞓醒咁樣樣啦。未知是否首次到書展為明星谷書，故梁齊昕有時都好興奮，影相時仲爭少少整跌咗個backdrop添。

問梁齊昕覺得四子中邊個身材最好？佢話:「下？呢個要除咗衫先睇到喎。」咁四子當然係冇理到佢啦。大合照時，梁齊昕又拍一拍鍾志峯個腹肌，讚道:「咦，有啲料到喎！」記者即邀請梁齊昕幫埋其餘三位囝囝即場驗證身材掂唔掂，佢就話:「唔好咁核凸啦，我唔想非禮人。你叫我性騷擾咩？」