【冷知識】唔講你唔知！沙田馬場飛機坪有N咁多個用途
機坪冷知識
喺外國，有唔少馬場附近都有停機坪，方便啲騎師搭直升機快來快走。
英國同愛爾蘭經常同日都有大賽，莫雅就成日兩邊飛，趕上下場搭直升機，避開塞車唔使趕到裙拉褲甩。
唔少大賽騎師例如戴圖理，都有自己嘅私人飛機。香港雖然唔同外國，兩個馬場唔會同日有馬跑，但沙田馬場都有個停機坪。
喺1978年開幕嗰日，時任港督嘅麥理浩，就係坐直升機空降馬場主持儀式。
每季半島金禧盃舉行當日，半島酒店集團掌舵人米高嘉道理，亦係搭直升機入場主持頒獎，呢啲咁有霸氣嘅鏡頭，一年只係得一次。
咁大個機坪咪好浪費？香港寸金尺土咁空曠嘅地方，梗係唔好嘥！
閒時機坪除咗用作馬匹操練、騎練密斟都喺呢度被攝記捕獲，戰略價值非常高。
機坪設有兩座一黑一白柱體，係天文台自動氣象站。黑柱測量氣溫、濕度、風速、雨量、風向同氣壓；白柱測量太陽輻射同暑熱壓力指數，24小時無間斷接收data。
公眾喺天文台App查分區天氣，就睇到機坪附近有個踱步圈。
馬匹往大跑道快跳前，都係喺機坪熱身，一般踱六至八個圈，一圈約300米，即係踱步兩公里，就有充足熱身，應付到運動量較強嘅快跳，減低受傷嘅風險。
-----------------------------