梁釗峰今日喺九龍灣出席ViuTV《全民造星》總決賽拜神，釗峰回想當年參加比賽，之後同其他參賽者組成C AllStar，笑言大家外型和高度相約，更成為好友，佢話o依家嘅參賽者較幸褔：「但我冇後悔早入行，同o依家參賽者嘅身高（相比），一定被比下去。」提到狄以達為好友、34號楊樂文（Lokman）拉票，釗峰話：「本身睇過佢做舞台劇，佢表演力豐富。」

Lokman得知咁多人幫自己拉票，表示開心，仲話好友狄以達自薦來做伴舞：「佢仲話如果有需要可以幪面出場，但我冇應承佢，我搵咗其他兄弟。」佢自言有歌手支持較有優勢，佢哋咁有實力介紹，啲人會留意。

而另一大熱99號姜濤佛系性格參與，並冇叫太多fans到時拉票：「我性格就係咁，冇刻意叫，如果真心支持我，會自己嚟。」被笑佛系性格嘅佢就笑言一切隨緣，自言入選已開心，預計咗完騷無論勝負，都會同全部參賽者慶功食飯。至於32號陳卓賢未完成比賽已獲電視台邀請拍劇，他希望多方面發展：「一開始參賽唔係以勝負為主，只係想多啲人認識認同，o依家已達到。」

精選娛聞，喺晒《娛果》
http://fb.com/appledailyent