【新增內容】

日本男星木村拓哉第二度襲台，應邀出席當地舉行嘅時尚界盛會「2018亞洲時尚大賞」（ASIA FASHION AWARD 2018 in Taipei），同場仲有林志玲、蔡依林、劉以豪、池端玲名、山田優、BoA、「強國新垣結衣」龍夢柔等嘉賓，係木村跟《月之戀人》拍檔林志玲相隔多年再次合體。

紅地毯盛會今日下午4時展開，林志玲手蹺木村壓軸登場，不過女方就穿上高踭鞋，令木村嘅腳短缺點表露無遺，笑容欠奉嘅木村自言好光榮能出席今次盛會，而再會志玲更感高興，佢仲記得伊人日前度過44歲生日，希望同佢晚飯補祝生日，站在旁邊嘅志玲聞言即掩嘴甜笑，並說：「太感謝他記得我的生日，那我也幫粉絲許願，希望他能多來台北。」聽日，木村會為代言PS4遊戲《審判之眼：死神的遺言》宣傳，逗留台灣約28小時便飛返日本。

木村在AFA打頭陣，孖住林志玲行騷，佢更難得晒中文：「大家好，我是木村拓哉，很高興來台灣。」木村由行紅地毯起就不時展現紳士風範，凡事皆以林志玲優先，落台時又不忘主動引導志玲，一舉一動都讓台下尖叫聲不斷。木村之後再次登台，以大使身份頒獎給廚師林泉。佢將獎座遞畀林泉後，仲好親切咁搭住對方膊頭合照，更送上祝福。

精選娛聞，喺晒《娛果》
http://fb.com/appledailyent