「舖王波叔」鄧成波孻仔鄧耀昇（Stan）嘅靚女太太葉靄璇（Vicky），今年4月誕下B女之後，未夠半年就火速收身。噚日佢同老公為旗下尖沙嘴東海薈．拉斐特The One分店開張，見到佢主持大局，非常sharp醒，完全唔似只係生咗BB幾個月。

今次呢間東海薈．拉斐特，係Stan同Vicky兩公婆第一次合作搞婚宴場地。Stan將原本只做小菜嘅東海酒家，重新揼本2,000萬銀裝修，夥拍Vicky主理嘅婚禮統籌專門店拉斐特，轉型專做婚宴，可以打通一次過擺57圍，除咗證婚同擺酒場地之外，仲會提供婚禮相關服務。
Stan話呢一、兩年經濟差咗，見到普遍結婚開支由最多40萬銀，跌到30萬銀左右，所以都唔敢加價，酒席用翻上年價錢。佢話保持呢個價格水平，好多人會接受到，新店由今個月開張起至農曆新年前嘅周六日婚宴已book滿。