雖然合和實業（054）主席胡應湘當年幫唐唐解圍時，曾經形容婚外情只係「課外活動」，又話「人不風流枉少年」，但佢本人其實係愛妻號一名。睇佢噚日喺股東會後，肯放下大男人身段，幫太太胡郭秀萍挽手袋一齊走，就知佢幾錫老婆喇。
需知道，香港地唔少男人唔肯幫女友或老婆挽手袋，認為幫女人挽手袋呢個動作唔夠man，分分鐘仲可能被人話係女尊男卑㖭呀。不過，年近80嘅胡應湘就冇呢種諗法嘞。

老婆帶兩個手袋

話說噚日胡太一個人拎兩個袋，一個G字頭大手袋同埋一個C字頭手袋仔，佢係合和非執董，有份跟埋胡應湘上台主持股東會。開完會後，佢拎住手袋仔就走，難得胡應湘記得老婆仲有個大袋，竟然仲二話不說，自己走返轉頭上台幫老婆搵袋，之後就幫老婆挽住個袋一齊走。
老實講，胡應湘平時說話個樣都幾有霸氣，估唔到都有柔情嘅一面，仲夠膽喺公眾場合放下大男人嘅身段，認真唔話得。正如佢曾經講過，「對老婆有責任，人家嫁給你，你不照顧周到就不是男人。」佢果然係好男人呀。
好男人當然知道幾時講乜，幾時封口喇。近排雨傘運動越演越烈，傳媒噚日當然有追問胡應湘對佔中有乜睇法，可惜，自從佢舊年炮轟過政府嘅樓市政策後，就好少講政治，好似年初被人問佢點睇施政報告同財政預算案，佢都耍手擰頭。
噚日佢繼續封口，話喺公司股東會唔適合講其他嘢，拋低一句，「希望（學聯與政府）開會成功。」就去如黃鶴。

李華華
mailto:[email protected]