中國對四年一度嘅全運會極為重視，一班運動員自然希望喺比賽使盡混身解數，贏得獎牌。而解放代表張雨涵喺今屆全運會更報名參加女子200自、400自、800自、1500自、4x200自接力等五項賽事，每項都勁消耗體力。

張雨涵早前已經贏到200自金牌同400自銀牌，佢喺周三嘅800自決賽落後15歲新星李冰潔一段距離嘅情況下，專注同王簡嘉禾爭銀牌，可惜最終游出8分22秒83、以0.07飲恨摘銅；而佢最後衝刺時游到筋疲力竭，賽後更出現休克，需要即時送院治療。