韓國五人女團EXID噚晚亮相JTBC節目《認識的哥哥》，人氣成員Hani提到自己以前曾與主持人姜虎東演出另一節目，當時佢喺節目上突然爆喊，多得姜虎東嘅安慰，所以好感激對方。

Hani性格爽朗深受觀眾喜愛，經常喺節目表現出開心一面，但其實佢習慣收埋自己唔開心一面。Hani喺《認識的哥哥》上表示曾喺一個節目上嘗試「修復瑜伽」，瑜伽老師曾對Hani說：「喺節目上見Hani好似好陽光活潑咁，但內心某個地方好似病咗，睇起嚟好攰。」隨即令Hani忍唔住爆喊，嚇親現場所有人，更導致錄影中斷。

Hani表示：「我知道當下工作人員都好慌張，所以我都想盡快收拾情緒。不過姜虎東突然喺我身邊安慰我：『係咪好唔開心？唔緊要，你可以喊出嚟』，呢番說話令我得到好大嘅安慰同力量，所以想對你(姜虎東)講聲多謝。」回想起呢段往事，Hani仍然忍唔住眼濕濕。

另外，EXID隊長率智前年因患上甲狀腺機能亢進症而停工，今次復工孖隊友亮相節目，Hani亦坦言當時唔知率智病咗：「當時(率智)姐姐好奇怪，佢食好多嘢，但食極都唔肥，我仲成日笑佢。」率智亦表示：「當時大食到會食三碗飯，而且成日都眼腫腫。有一次去越南出席活動時曾經燒到39.6度，之後因為再撐唔落去，所以就停工。」

精選韓流，喺晒《娛果》
http://fb.com/appledailyent