當年今日

求驗客手記:細哨炒12碼SoBad! - 求驗客

蘋果日報 2008/12/01 00:00


AC米蘭作客不嬲靠晒巴西兵數糊,所以前晚作客巴勒莫,當卡卡停賽、柏圖踢唔夠三分一就傷出,唔使問阿貴都知靠晒朗拿甸奴(細哨)。殊不知喺0:0嘅時候,細哨好炒唔炒,死去炒球12碼,累球隊輸1:3,呢鋪真係成也細哨、敗也細哨。AC繼續做作客輸盤王,長追仲慘過買咗雷曼債券呀陰功!
累AC輸波孭晒鑊
唔係講笑,計埋今場AC今季7場作客入7球,有6球嚟自「巴西3叉戟」,細哨獨佔3球,本來好威。今場上半場27分鐘,柏圖冒住受傷危機博到球12碼,諗住帶挈細哨一顯身手,可惜佢射向球門右下角被門將艾米利亞擋出,老貓燒鬚。巴勒莫唔使講士氣大振,由米高利、卡雲尼同森比斯奧各入一球領先3:0。
到完場前7分鐘,細哨又有機會射12碼,呢次驚死射番左邊,點知又俾艾米利亞吼到路,好彩都叫有角度照入網。點都好,呢個功,補唔到上半場個過。佢投身意甲後首次造訪西西里就吃悶棍,sobad!
好啦,AC衰埋呢場後落後國際米蘭6分跌落第3固然衰,最衰仲係累街坊。我求大俠借用澳彩數據,以亞洲讓球盤計7場作客意甲1贏盤6輸,再以4大聯賽前列球隊計,冇一隊作客盤路衰過AC,連德甲名牌衰波拜仁慕尼黑(3贏3輸1走盤)都行埋一邊,睇你仲敢唔敢追?
好喇,AC今次輸畀西西里球隊巴勒莫,下場聯賽(嚟緊禮拜日)主場對另一支西西里球隊卡坦尼亞;卡軍教練辛格球員時代屬於國米系,同AC唔慌老友,真係揀錯時間同AC交手,做硬出氣袋,隨時黑狗偷食,白狗當災。
empty
設計圖片及對白