點解一個代表都冇?政府怕乜呀?
有個粵劇人同我講:「鬼咩,粵劇界好多山頭㗎,你畀得呢個,嗰個嘈;畀得嗰個,呢個嘈。大家都咁高咁大,點解你可以代表我呀?政府唔想麻煩啫。」
我又唔係咁睇。
粵劇界近年要求嘅無非係:
一、政府要重視粵劇;
二、要求有一個理想嘅粵劇劇場。
我見過聲姐經常出沒諮詢會,講嘅都係呢啲嘢,而政府嘅反應係冇反應。上列兩點要求,唔理你有幾多山頭(有人就有山頭,除非你住喺荒島)都係要做嘅。
其他界別冇山頭咩?有山頭唔緊要,但係唔好搞山頭。汪阿姐、阿聲姐,冇粵劇界人入委員會仲好呀,點解呀?大家名正言順咁睇實班委員會囉,有唔啱嘅咪嘈囉。
「你哋係唔係想瓜分西九呀?!」
呢個就係你哋要問嘅問題。
以前係:得西九,得天下;𠵱家係:分西九,分天下!(地產商在內)。
各位粵劇界朋友,香港已經變咗係一個唔嘈冇jetso嘅世界。曾特首最怕就係嘈,連任首要就係冇人嘈。
嘈喇。嘈就喺添馬艦起個中心畀你,唔嘈呢就永世屈喺高山劇場。
西九?好細啫。
觀火
傳真︰2623-9278
電郵︰
[email protected]